SELAMAT HARI GAWAI

Gawai siti ari pengerami ti disambut bala orang Dayak di Sarawak.  Pengerami tu nanda ke pengabis musim ngetau.  Gawai disambut enggau naka pengerami di tiap-tiap sitak menua ti bisi nyambut pengerami tu.  Gawai tu sebaka mega Tahun Baru Cina laban nanda ke taun baru ti disampi meri pengidup ti menyana ari taun ke udah sereta bulih limpah enggau berekat ke ngundang idup ti meruan.  Alai nya, lebuh nyambut Hari Gawai, siti pengawa ti mesti dikereja ke dulu sebedau pengawa ke bukai; ngirup ai pengayu.  Ai pengayu nanda ke peminta bala Dayak umur ti panjai enggau reta ti belimpah ruah.  Enti baka suba, ai pengayu ke diirup nya sigi ai tuak.  Tang diatu, mayuh bala nembiak ke dudi hari enggai tauka enda diasuh ngirup ai tuak laban ke agi belajar.  Ai tuak tau diganti enggau ai irup ke bukai tang ai nya tetap nanda ke ai pengayu.  

Tiap-tiap menua enka bisi lain mimit ari adat enggau pengawa maya ngerami Gawai.  Tu bepanggai ngagai siti-siti menua.  Enti di menua aku empu, semua bala nembiak di rumah panjai deka bekumpul di ruai tuai rumah sebedau tuai rumah bejaku meri lalau enggau tesau ngagai bala nembiak ngambi ke nyambut Hari Gawai tu enggau meruan.  Anang ngelaya orang enti mabuk enggau pesan ke bukai.  Udah nya baru semua nembiak ba rumah panjai sama seretai ngirup ai pengayu kira-kira pukul 12.01 am 1hb Enam.  Udah tembu ngirup baru pengerami mula.  Maya tu, sekeda bisi nya betaboh, ngajat tauka karaoke sampai ke dinihari.  Udah nya pengerami deka disambung baru.  Sekeda nya bejalai nyenguk kaban belayan di rumah panjai ke bukai lalu sama nuruk pangan diri bejalai enggau ngerami Gawai.

Pengerami Gawai di rumah ndang sigi jauh lebih nyemetak agi bebanding di pasar.  Kebuah pia laban maya tu meh kitai deka meda peturun asal orang Iban dibantai ke bala sida ke tuai.  Tang orang ke megai pengarap Kristian enda diasuh nggau sama bebiau tauka miring laban nya ngelanggar pengarap Kristian.  Tang nadai salah kitai meda pengawa asal kitai empu ngambi ke bisi nyadi buah kenang kedudi ari ila.

Pengerami Gawai ke sigi nyadi pengingat aku sampai ke diatu ianya pengerami taun nyin suba.  Nyambut Gawai enggau ati ti enda lantang enggau chukup ia pemerinsa sigi dikenang sampai ke mati.  Aku ke biak tu ulih ngasai ke penusah nya, kati ke bala sida ke tuai?  Taja pia, utai ke udah nyadi nda ulih diputar baru.  Pengidup tetap diterus ga taja bisi maya ati sigi pedis laban ngenang utai ke udah nadai.  Semua nya ngasuh ati aku lebih berani nunga penusah lalu ngajar diri empu ngambi besabar.

Terima kasih ngagai Tuhan laban ke udah meri berekat sepemanjai taun ke udah taja pan mayuh amai penguji ti datai nuntung.  Aku pechaya Iya ke di atas nyin sigi meruan meda enggau ngatur pengidup ke menyana ngagai semua bala anak Iya.  Ngicha ke taun tu kami serumah bulih idup ke menyana agi ari taun ke udah.

SELAMAT HARI GAWAI ngagai semua bangsa Iban enggau Bidayuh ke nyambut pengerami tu. Ngarap ke kitai sama bulih pengidup ti jauh lebih manah ari ke saritu.

Amen.